Phili 1 | TGG | STEP | Iau Pol kama e Timoti, kama iun fafauun ke Karisito Iesu. Kama sisiit usuf fanu kalkaluu tikii ke God, turan foron famfamu na lotu ke foron tom falupes na lotu ae ri unune lo Karisito Iesu, na Pilipai.

Philippians 1

1 Iau Pol kama e Timoti, kama iun fafauun ke Karisito Iesu. Kama sisiit usuf fanu kalkaluu tikii ke God, turan foron famfamu na lotu ke foron tom falupes na lotu ae ri unune lo Karisito Iesu, na Pilipai. 2 Famais ke siaroh usuf gam sing God Tama kerer, ke Kumguui Iesu Karisito.

Pol i Sising ulon Fan Pilipai

3 Foron aunbiing tikii, ae ia wol pes gam la, ia fotrokap la usuf God kiak. 4 Na foron sising tikii kiak usuf God isi gam tikii, ia sising la tom ini laes. 5 Ia laes, wara na rokap na ti turim kimi turang na Rokap na Fafas tina tanwara, papang igii. 6 Ia usum tom le, God ae i tanwara ta nenge rokap na foim na liu kimi, in foim lalala ma ik farop u, papang na biing ke Karisito Iesu.

7 I tortores tom le in mel e matngan wolwol aragii sing iau isi gam tikii, wara le gam kiis na eteng. Taftawa le ia kiis na kamkabet, le ia tikale fanu ae ri orek laulau na Rokap na Fafas, le ia farakrakai Fafas ae, gam sabin gam ti turim ta turang na foim ae God i ta ta u sing iau na famais kia. 8 God i usum le ia lala kalkal tom isi ian par gam, wara le ia ier kanaka isi gam ini famais ke Karisito Iesu.

9 Ma ia sising le famais kimi in laumet lalala, ke tasum sabin kimi in kuum turan sinangun iliim fakasi tier. 10 Male gamen tapiek arae, ke gamen par failiim foron tier ae i rokap kanaka, ke gamen kalkaluu, ma biil ifasih rin tiu gam ini ti tier na biing ke Karisito. 11 Ke liu kimi in fuun ini fuan tortores na sinang, ae Iesu Karisito i fatapiek u, ma na foron fua gam, fanu rin me God ke rik usefages u.

Kiis ke Pol na Kamkabet i Lupes Rokap na Fafas isi ik la sararah

12 Foron tuaklik, ia ier isi gamen usum na foron tier ae i tapiek tah lo iau, ka lupes Rokap na Fafas tom isi ik sararah una foron falifuh tikii. 13 Ke pesu, foron tom fapaket ae ri parpar kale la na fel ke Sisar, turan fal e fanu sabin, ri usum le ia kiis na kamkabet, wara lo Karisito. 14 Kiiskiis kiak na kamkabet, ka farakrakai ta ifuun e tuaklik na asa Kumguui. Pesu, ri ka rakrakai na fafas ini Rokap na Fafas, ma biil ri sokeh.

15 I tekentu le fal ri fafas ini Karisito, wara le wolwol kiri ulo iau i laulau, pesu ri ka ier isi rin fapuh iau tina kiiskiis an famfamu kiak. Isau le fal lo ri, ri fafas ini rokap na balri. 16 Ri tel u arae ini famais, wara ri usum le God tom i tus pes ta iau isi ian tikale fanu ae ri orek laulau na Rokap na Fafas. 17 Isau le fal, ri fafas ini Karisito, ri garan sau. Ri ram na matngan kiiskiis ae i laumet, pesu ri ka wol le in malmuh ulo ri, le rin fatapiek foron tatawin ulo iau na aunbiing ia kiis biitom na kamkabet. 18 Isau le i rokap. Male rin fafas ini wolwol laulau, le ini tekentu na wolwol, i rokap sau. Tier sau ae i laumet i aragii, ri tikii ri fafas tom ini Karisito. Pesu ia ka laes.

Ma ian laes la tom, 19 wara ia usum le, na foron sising kimi ke na falupes ke Tanwa Iesu Karisito, sanih ae i tapiek ta lo iau in sokiliis isi iak sengsegeng. 20 Na wolwol tikii kiak, ia unune le biil ian tel ti tier una famatlawen iau. Isau le ia lala ier le in mel e rakrakai kiak una sik asa Karisito igii, arae tom tin pakanini. Taftawa le ia liu le ia met, liu tikii kiak una sik asa Karisito. 21 Wara le ia wol aragii, male ian liu, ian liu tura Karisito. Isau male ian met, ke in rokap kanaka tom. 22 Male ia liu biitom ini liu na pununfo, ia usum le foim kiak in mel e rokap na fua. Biil ia usum le neng sah lo ruh ian tim pes u, ian liu le ian met. 23 Iwu e wolwol kiak. Ia ier le ian la koseng liu igii ma iak la usuf Karisito, ae in rokap kanaka. 24 Isau le in rokap sabin kimi le ian liu biitom. 25 Pesu ia usum tom le ian liu biitom, ma iak kiis tura gam isi unune kimi ik kuum lalala. Ma gamek laes i wara na unune kimi. 26 Aunbiing keren fatafe sabin, ke gamek lala laes ini Karisito Iesu, i wara na tapiek kiak usuf gam.

27 Tier ae i laumet i aragii, gamen liu ini matngan liu ae i tortores fasih ini Rokap na Fafas ke Karisito. Pesu, male ian la tom isi par gam, le biil ia la, ia ier isi ongen ti fal e rokap na ususe lo gam, le gam tifat ini itikii e wolwol, ke gam ka foim rakrakai turim tom arae itikii sau e kaltu, isi fanu rik unune na Rokap na Fafas. 28 Ma gong gam soke foron tuui kimi. Matngan sinang arae, in finngas famalal ri le, God in falaulau ri ma ik faliu gam. 29 Wara le God ka fakalok ta gam, biil na unune kimi sau lo Karisito, isau le na fangungut sabin ae gam kalsakai u na asa. 30 Gam ka kalsakai fangungut arae, wara le gam sabin gam kau na fapaket ae gam par ta u ia kiis ta lo, ma igii biitom ia kiis lo, arae gam ka ongen ta u.